GalegoLab

A actividade tecnocientífica en todo o mundo e tamén en Galicia está controlada e rexida polos axentes sociais que a levan a cabo. Neste contexto as opinións ou as propostas da sociedade galega, en xeral, non son tidas en conta. Ao día de hoxe calquera tipo de mudanza nas liñas de investigación, nos proxectos de anovación, etc. son desenvolvidos en función de plantexamentos partidistas e arredan a sociedade da toma de decisións.

Por mor diso, cómpre que existan mecanismos e procesos participativos eficaces que permitan que os galegos podamos ter algo que dicir ao respecto. O grave problema que podemos toparnos é coa desconfianza e recelo por parte dos axentes tecnocientíficos. Isto obriga a que a proposta e a materialización da mesma teña que ser seria, sólida e fundamentada.

Coido que sería moi bo para Galicia que se xerasen estructuras informais de análise, debate e participación en rede sobre as diversas iniciativas públicas e privadas que xurdan ao redor da actividade tecnocientífica.

Esta idea tentaría desenvolver un entorno virtual de participación publica e democrática, pero non só iso. A idea é tamén manter informados aos participantes dun xeito sinxelo e veraz (non só tendo en conta a información dos medios de comunicación) para que eles poidan tomar partido por aquela iniciativa, proposta, lei, etc. que consideren mellor para o país. Para isto é preciso ter unha rede de coordinación, constituida por xente con coñecementos nos diversos eidos do saber, que informe e ilustre dun xeito independente e neutral das achegas tecnocientíficas e das medidas que un determinado axente ou grupo social desexa levar a cabo. Deste xeito, os participantes -logo de informárense- poderían participar e debater as iniciativas.

Por isto, a plataforma tentaría ter tamén unha expresión física a través de encontros e debates que incremente a participación colectiva e o interese. Amais, con cada un dos temas discutidos farase un manifesto que será remitido aos responsables políticos para que tomen as medidas oportunas e aos medios de comunicación convencionais para que informen á sociedade. Isto fai que a plataforma tería que ter capacidade de resposta rápida perante unha posible urxencia puntual.

A presente iniciativa está inmersa nunha lóxica colectiva polo que é indispensable unha participación activa de un bo número de persoas. Posiblemente este xesa un dos grandes problemas con que nos atopemos á hora de poñelo en marcha. Porén, de levarse a termo esta proposta Galicia converteríase nunha das rexións pioneiras nos procesos de democratización e debate político da tecnociencia.

Inicialmente:

- Xente interesada e participativa.
- Coordinadores especializados.

- Fomentar a participación pública na tecnociencia.
- Fomentar a democratización da tecnociencia.
- Xerar mecanismos de debate e participación.
- Tentar intervir nos procesos políticos de toma de decisión.
- Apostar pola divulgación de calidade.

Vai dirixida a toda a poboación interesada.

A duración é indeterminada inda que pretende ter visos de prolongación no tempo.

Precisaría a participación de institucións científicas formais (Real Academia Galega de Ciencias, Universidades, Consello da Cultura Galega, Centros Tecnolóxicos, Organismos Públicos de Investigación, Fundacións, etc.)

Implicaría a necesidade de diversos coordinadores especializados.

Capacidade rápida de resposta (compromiso dos coordinadores)

Traballo en rede.

Cando teña o persoal necesario (10 persoas, polo menos, de diversos eidos do saber)

- Experiencia en coordinación de equipos.
- Coñecemento da actividade tecnocientífica.
- Compromiso coa democratización da tecnociencia.