Que é GalegoLab?
GalegoLab é unha nova forma de organizarse e de colaborar en proxectos que teñan por obxectivo a promoción da lingua galega.
Cremos que:
- Unha boa idea, ben presentada e ben traballada, pode chegar lonxe.
- Entre moitos e moitas pode facerse posible o difícil.
- Aínda que o debate é interesante, o prioritario é pasar á acción.
Consulta se queres máis información sobre a Asociación GalegoLab.
Que é o crowdsourcing?
O crowdsourcing é a organización de grupos informais de xente para conseguir obxectivos reais e concretos.
A wikipedia ou linux son exemplos coñecidos de crowdsourcing, onde moitos e moitas se teñen xuntado para cooperar na medida das súas posibilidades, e de xeito electrónico.
Que podo facer?
En GalegoLab podes facer cinco cousas principais:
- Presentar ideas.
- Transformar ideas en proxectos.
- Axudar a mellorar ideas doutros/as.
- Priorizar cos teus votos as propostas prioritarias.
- Colaborar na realización de proxectos.
A regra do todo ou nada
Un principio básico de GalegoLab é que é necesario que un proxecto consiga todos os recursos necesarios antes de que os cartos (ou a furgo, ou o tempo) cambien de mans.
Por que?
- É menos arriscado para todo o mundo.
- Anima a xente a comprometerse, sabendo que se non vai adiante non perde nada.
- Consegue que os cálculos de recursos sexan máis exactos, o que aforra cartos e paciencia.
Pode alguén sacar diñeiro para o seu beneficio propio?
GalegoLab baséase no voluntarismo, e tanto promotores/as de ideas como colaboradores/as botan unha man porque están interesados/as en promover a lingua galega, sen máis beneficio ca ese (que non é pouco).
Ora ben, hai recursos que só se poden conseguir con diñeiro, e para iso hai un sistema de pagamento.
Quen se ocupa de vixiar os cartos?
A responsabilidade dos cartos corre a cargo da persoa que promove o proxecto.
GalegoLab ocúpase de comprobar que os cartos e os demais recursos se empreguen no que se dixo que se ían empregar.