Como podo colaborar cun proxecto en marcha?
Cando vexas unha proposta que che mole, podes achegar cartos ou outros produtos e servizos para que se leve a cabo.
Como funciona o dos recursos?
Todos os proxectos terán unha lista de necesidades e un prazo de tempo. As necesidades poden ser de diñeiro, de materiais, de servizos ou de colaboracións. por exemplo, un proxecto pode necesitar 120€, unha mañá dunha furgoneta, dúas persoas e a tradución dun texto de 5000 palabras.
Eses recursos terán que conseguirse nun determinado prazo, que nunca será maior de 90 días.
E se me equivoco cos cálculos e pido de máis ou de menos para o meu proxecto?
Cando botes a andar unha idea, unha persoa de GalegoLab porase en contacto contigo e axudarache a que planifiques ben os recursos do proxecto. Por iso non vai haber mal.
Que pasa cando se conseguen os recursos?
Cando se consegue o compromiso dos recursos dentro do prazo determinado, o promotor/a do proxecto recibe o diñeiro na súa conta, así como os demais recursos, e pon en práctica a actuación.
E se non se conseguen?
Pois daquela nada. Os cartos non chegan a mudar de mans, as furgos non se emprestan, e non pasa nada. Arquívase a iniciativa.
Quero conseguir fondos para a miña asociación. Iso vale?
Non. Para iso xa tes as rifas e o sorteo do leitón.
GalegoLab só promoverá proxectos cun fin concreto, e os recursos teñen que destinarse exclusivamente a esa actuación.
Como vai o do diñeiro? Vanse usar os cartos dun proxecto para outro proxecto?
Non, nunca. Endexamais. Todo o que ten que ver cos cartos ten a súa propia sección de axuda. Bótalle un ollo.
E como vai o das outras colaboracións?
Podes comprometer a túa axuda non monetaria premendo o botón correspondente no proxecto: a túa tradución, o teu coche, a túa tarde de domingo.
Para evitar esquecementos, ímosche pedir o nome e o teléfono, ademais do correo electrónico. Eses datos persoais non serán públicos se non queres, pero o promotor/a do proxecto si que terá acceso a eles.
Como podo convencer a xente de que achegue o que necesito?
GalegoLab pon á túa disposición un espazo para que vendas a túa idea. Tenta ser o máis creativo/a posible, tanto ao pensala como ao comunicala. Usa texto, fotos, vídeos e todo o que teñas a man. E poderás compartilo en Twitter e en Facebook, ou usar un widget para poñer na túa web ou blog.
Tamén axuda que penses proxectos viables e que necesiten poucos recursos.
E se non se leva a cabo o proxecto, que pasa co que me comprometín a facer?
Se non se chegan a recadar os recursos en tempo, recibirás un correo (ou unha chamada) dicíndoche que xa non fai falla que fagas nada.